భారత క్రికెట్ జట్టు వెటరన్ ఓపెనర్ రోహిత్ శర్మ మరో అరుదైన రికార్డును అందుకునే అంచున నిలిచాడు. ఇప్పటికే టీ20, టెస్ట్ ఫార్మాట్లకు వీడ్కోలు పలికిన హిట్‌మ్యాన్ ప్రస్తుతం వన్డేలకు మాత్రమే ప్రాతినిధ్యం వహిస్తున్న విషయం తెలిసిందే. నేటి నుంచి భారత్–సౌతాఫ్రికా మధ్య మూడు వన్డేల సిరీస్ ప్రారంభం కానుండగా, ఈ సిరీస్ రోహిత్‌కు చారిత్రాత్మకంగా మారే అవకాశం ఉంది.
మరో మూడు సిక్సులు కొడితే ‘సిక్సుల కింగ్’!
వన్డేల్లో రోహిత్ శర్మ ఇప్పటివరకు 349 సిక్సులు బాదాడు. ప్రపంచ క్రికెట్‌లో అత్యధిక వన్డే సిక్సులు కొట్టిన ఆటగాడు పాకిస్తాన్ స్టార్ షాహిద్ అఫ్రిది, అతడి సిక్సుల సంఖ్య 351. అంటే రోహిత్ మరో మూడు సిక్సులు బాదితే అఫ్రిదిని అధిగమించి వన్డేల్లో అత్యధిక సిక్సులు కొట్టిన ఆటగాడిగా చరిత్రలోకెక్కనున్నాడు.
రోహిత్ పుల్ షాట్‌కు ప్రపంచవ్యాప్తంగా భారీ ఫ్యాన్‌ ఫాలోయింగ్ ఉంది. అతడి సిక్స్ హిట్టింగ్ సామర్థ్యం వలననే ఈ రికార్డు ఇప్పుడంత చేరువగా కనిపిస్తోంది. తొలి వన్డేలోనే ఈ ఘనత సాధించే అవకాశం ఉండటంతో భారత అభిమానులు భారీ ఆశలు పెట్టుకున్నారు.
వన్డేల్లో అత్యధిక సిక్సులు కొట్టిన టాప్–5 ఆటగాళ్లు
షాహిద్ అఫ్రిది (పాకిస్తాన్) – 351
రోహిత్ శర్మ (భారత్) – 349
క్రిస్ గేల్ (వెస్టిండీస్) – 331
సనత్ జయసూర్య (శ్రీలంక) – 270
ఎంఎస్ ధోనీ (భారత్) – 229
సౌతాఫ్రికాతో నేటి మ్యాచ్‌లో రోహిత్ శర్మ రికార్డు సృష్టిస్తాడా? అన్న ప్రశ్న ఇప్పుడు క్రికెట్ ప్రపంచంలో ఆసక్తి రేపుతోంది.
