ఐకాన్ స్టార్ అల్లు అర్జున్ గారాలపట్టి అల్లు అర్హ చిన్న వయసులోనే మరో అరుదైన రికార్డును అందుకుంది. చదరంగంలో అసాధారణ ప్రతిభను ప్రదర్శించిన అర్హ, యంగెస్ట్ చెస్ ట్రైనర్‌గా నిలిచి, ప్రతిష్టాత్మక నోబుల్ బుక్ ఆఫ్ రికార్డ్స్‌లో చోటు దక్కించుకుంది. ఈ వార్త ప్రస్తుతం సోషల్ మీడియాలో వైరల్ అవుతోంది. వివరాల ప్రకారం, అల్లు అర్హ మొత్తం 30 చెస్ పజిల్స్‌ను పరిష్కరించడం కోసం 50 మంది విద్యార్థులకు శిక్షణ ఇచ్చింది. అతి చిన్న వయసులోనే ఇంత పెద్ద సంఖ్యలో విద్యార్థులను విజయవంతంగా ట్రైన్ చేయడంతో, ఆమె ప్రతిభను గుర్తించిన నోబుల్ బుక్ అధికారులు ఈ ప్రత్యేక రికార్డును నమోదు చేశారు.
ఇప్పటికే అల్లు అర్హ తెలుగు ప్రేక్షకులకు బాగా పరిచయమే. అల్లు అర్జున్ తరచూ సోషల్ మీడియాలో పంచుకునే ఆమె క్యూట్ వీడియోలు, డాన్స్ క్లిప్స్ వల్ల అర్హకి భారీ ఫాలోయింగ్ ఏర్పడింది. గతంలో ‘శాకుంతలం’ సినిమాతో బాలనటిగా చేసిన అరంగేట్రం కూడా ప్రేక్షకులను ఆకట్టుకుంది. ఆమె నటన, స్పష్టమైన తెలుగు ఉచ్ఛారణ, తెరపై చూపించిన నైజస్వభావం విమర్శకుల ప్రశంసలను అందుకుంది. ఇప్పుడు చదువుతో పాటు చదరంగంలోనూ తన ప్రతిభ ప్రదర్శించడం అభిమానులను మరింత ఆకర్షిస్తోంది.
అర్హ రికార్డు పొందిన విషయం బయటకు వచ్చిన వెంటనే నెటిజన్లు ఆశ్చర్యం, ఆనందం వ్యక్తం చేస్తున్నారు. “తండ్రికి తగ్గ కూతురు, అల్లు అర్జున్ స్ఫూర్తిని అర్హ కొనసాగిస్తోంది” అంటూ సోషల్ మీడియాలో కామెంట్ల వర్షం కురుస్తోంది.
