ప్రధాని ఆంటోనీ అల్బనీస్ తన ప్రేయసి జోడీ హేడెన్తో వివాహం చేసుకుని చరిత్ర సృష్టించారు. ఆస్ట్రేలియా రాజకీయ చరిత్రలో పదవిలో ఉండగానే పెళ్లి చేసుకున్న తొలి ప్రధానిగా అల్బనీస్ నిలిచారు. 62 ఏళ్ల అల్బనీస్, ఫైనాన్షియల్ సర్వీసెస్ రంగంలో పనిచేస్తున్న జోడీ హేడెన్తో జీవిత బంధం లోకి అడుగుపెట్టారు. కాన్‌బెర్రాలోని ప్రధాని అధికారిక నివాసం ‘ది లాడ్జ్’ గార్డెన్‌లో కుటుంబ సభ్యులు, సన్నిహితులు మాత్రమే పాల్గొన్న ఈ వివాహ వేడుక అత్యంత నిరాడంబరంగా జరిగింది. పెళ్లి అనంతరం జంట చేతులు పట్టుకుని వెళ్తున్న వీడియోను అల్బనీస్ “Married” అనే ఒక్క పదంతో తన సోషల్ మీడియాలో పోస్టు చేశారు.
“మా జీవితాన్ని కలిసి పంచుకోవాలన్న ప్రేమను, నిబద్ధతను మా కుటుంబం, స్నేహితుల మధ్య తెలియజేయడం ఎంతో సంతోషంగా ఉంది” అని ఈ జంట ఒక సంయుక్త ప్రకటనలో వెల్లడించింది. వివాహ వేడుకలో ప్రత్యేక ఆకర్షణ అల్బనీస్ పెంపుడు కుక్క ‘టోటో’. ఈ చిన్నారి కుక్క రింగ్ బేరర్‌గా వ్యవహరించి అందరి దృష్టిని ఆకర్షించింది. 2024 వాలెంటైన్స్ డే రోజున అల్బనీస్ జోడీకి ప్రపోజ్ చేసిన విషయం తెలిసిందే.
అల్బనీస్‌కు 2019లో మొదటి భార్యతో విడాకులు జరిగినా, వారికి నాథన్ అనే కుమారుడు ఉన్నాడు. మెల్‌బోర్న్‌లో జరిగిన ఒక బిజినెస్ డిన్నర్‌లో ఐదేళ్ల క్రితం అల్బనీస్–జోడీకి పరిచయం ఏర్పడింది. పెళ్లి అనంతరం ఈ నూతన దంపతులు సోమవారం నుంచి ఐదు రోజుల హనీమూన్ కోసం ఆస్ట్రేలియాలోనే ప్రయాణం చేయనున్నారు.
