విశాఖపట్నం: డిసెంబర్ 4న జరగబోయే నేవీ డే ఉత్సవాల ముందస్తు వేడుకల భాగంగా తూర్పు ప్రాంత నావికాదళ కమాండ్ ఆధ్వర్యంలో విశాఖపట్నంలోని సముద్రిక ఆడిటోరియంలో శనివారం సాయంత్రం నిర్వహించిన ‘సర్గమ్ 2025 – ఇండియన్ నేవల్ సింఫనిక్ ఆర్కెస్ట్రా’ కార్యక్రమానికి ఉప ముఖ్యమంత్రి పవన్ కళ్యాణ్ ముఖ్య అతిథిగా హాజరయ్యారు.
విశాఖ విమానాశ్రయంలో నేవల్ ఆఫీసర్లు రజనీష్ శర్మ, కిషోర్, శాసన సభ్యులు కొణతాల రామకృష్ణ, వంశీ కృష్ణ యాదవ్, సుందరపు విజయ్ కుమార్, పంచకర్ల రమేష్‌తో పాటు జిల్లా అధికారులు ఉప ముఖ్యమంత్రిని భవ్యతరంగా ఆహ్వానించారు. అనంతరం పవన్ కళ్యాణ్ శౌర్య అతిథి గృహానికి చేరుకోగా, విశాఖ పోలీస్ కమిషనర్ శంఖబ్రత బాగ్చి ఆయనను మర్యాదపూర్వకంగా కలిసి మాట్లాడారు. తరువాత సముద్రిక ఆడిటోరియంకు చేరుకున్న పవన్ కళ్యాణ్‌కు చీఫ్ అడ్మిరల్ సంజయ్ భల్లా, ఆయన సతీమణి శ్రీమతి ప్రియా భల్లా స్వాగతం పలికారు.
నేవీ బ్యాండ్ సంగీత విన్యాసాలు మంత్రముగ్ధులను చేశాయి
సర్గమ్ 2025 కార్యక్రమంలో భాగంగా తూర్పు ప్రాంత నావికాదళ సింఫనీక్ బ్యాండ్ చేసిన సంగీత ప్రదర్శనలు ప్రేక్షకులను ఆకట్టుకున్నాయి. మ్యూజిక్ కంపోజర్ మరియు ఈస్ట్రన్ నేవల్ కమాండ్ బ్యాండ్ డైరెక్టర్ సతీష్ ఛాంపియన్, డిప్యూటీ డైరెక్టర్ ప్రదీప్ కుమార్ లయబద్ధంగా ప్రదర్శనలకు దర్శకత్వం వహించారు. దేశభక్తి గీతాలు, హిందీ పాటలు, పర్యావరణంపై అవగాహన కలిగించే సంగీత రూపకాలు—అన్నీ మేళవించిన ఈ సంగీత విన్యాసాలు గంటకు పైగా కొనసాగి ప్రేక్షకులను సమ్మోహితం చేశాయి.
ఈ వేడుకలో ముఖ్య అతిథిగా హాజరైన ఉప ముఖ్యమంత్రి పవన్ కళ్యాణ్ చేతుల మీదుగా ‘లయన్ కింగ్ మ్యూజిక్ మెమెంటో’ను శరత్ కుమార్ సింగ్‌కు అందజేశారు. వైస్ అడ్మిరల్ సంజయ్ భల్లా చేతుల మీదుగా ఉప ముఖ్యమంత్రి పవన్ కళ్యాణ్ స్మారక బహుమతిని స్వీకరించారు. ఈ కార్యక్రమానికి పవన్ కళ్యాణ్ కుమారుడు అకీరా నందన్ కూడా హాజరై అందరి దృష్టిని ఆకర్షించారు.
