గోవా : దక్షిణ గోవా జిల్లాలోని కనకోన పట్టణం వద్ద ఉన్న శ్రీ సంస్థాన్ గోకర్ణ పార్టగాలి జీవోత్తం మఠంలో ప్రతిష్టించిన 77 అడుగుల ఎత్తైన శ్రీరాముని కంచు విగ్రహాన్ని ప్రధానమంత్రి నరేంద్ర మోదీ శుక్రవారం ఆవిష్కరించారు. మఠం 550వ వార్షికోత్సవంని పురస్కరించుకుని ఈ విగ్రహావిష్కరణ భవ్యంగా నిర్వహించారు.
సాధువులు, సంతులతో ఆధ్యాత్మిక అనుబంధాన్ని గుర్తుచేసుకున్న ప్రధాని
ఈ సందర్భంగా మాట్లాడిన ప్రధాని మోదీ, సాధువులు, సంతులతో తనకున్న ఆధ్యాత్మిక బంధాన్ని స్మరించుకున్నారు. భారత సంస్కృతి, ఆధ్యాత్మిక వారసత్వంతో ప్రజలు మరింతగా మమేకమయ్యేందుకు ఈ కార్యక్రమం ఎంతో దోహదపడుతుందని పేర్కొన్నారు. భారతీయ సంస్కృతి శక్తి, విలువలను యువతరం అర్థం చేసుకోవడానికి ఇలాంటి వేడుకలు ఎంతో కీలకమని అన్నారు.
15,000 మంది పాల్గొన్న మహోత్సవం
మఠం 550 సంవత్సరాల చరిత్రను గుర్తు చేస్తూ, ఈ ఈవెంట్‌ను ఘనంగా నిర్వహించారు. ఆర్గనైజేషన్ కమిటీ జాయింట్ కన్వీనర్ ఎస్. ముకుంద్ కామత్ తెలిపిన మేరకు, ఈ కార్యక్రమానికి 15,000 మంది పాల్గొన్నారు. ఈ సందర్భంగా ప్రముఖ గాయకులు శంకర్ మహదేవన్, అనూప్ జలోటా తదితరులు పాల్గొని ప్రత్యేక సాంస్కృతిక కార్యక్రమాలతో సభను రంజింపజేశారు.
సారస్వత బ్రాహ్మణ వైష్ణవ సంప్రదాయం కలిగిన తొలి మఠం
ప్రధానమంత్రి కార్యాలయం విడుదల చేసిన ప్రకటన ప్రకారం, శ్రీ సంస్థాన్ గోకర్ణ పార్టగాలి జీవోత్తం మఠం సారస్వత బ్రాహ్మణ వైష్ణవుల తొలి మఠంగా గుర్తించబడింది. దక్షిణ గోవాలోని పార్టగాలి ఈ మఠానికి ప్రధాన కార్యాలయం. ఈ మఠం 13వ శతాబ్దంలో జగద్గురు మధ్వాచార్యులు స్థాపించిన ద్వైత సిద్ధాంతాన్ని అనుసరిస్తూ శతాబ్దాలుగా ఆధ్యాత్మిక సేవలను అందిస్తోంది.
