32 బొమ్మల దుకాణాలు భస్మం – వ్యాపారులకు కోట్లాది నష్టం
జగిత్యాల జిల్లాలోని ప్రముఖ పుణ్యక్షేత్రం కొండగట్టులో శనివారం రాత్రి భారీ అగ్నిప్రమాదం సంభవించింది. ఈ ఘటనలో మొత్తం 32 బొమ్మల దుకాణాలు పూర్తిగా కాలి బూడిదయ్యాయి. వ్యాపారులకు కోట్లాది రూపాయల ఆస్తి నష్టం జరిగినట్లు ప్రాథమిక అంచనాలు వెల్లడిస్తున్నాయి.
రాత్రి 11 గంటల సమయంలో మంటల ప్రబలం
శనివారం రాత్రి సుమారు 11 గంటల సమయంలో కొండగట్టు ఘాట్ రోడ్డులోని అభయ హనుమాన్ విగ్రహం నుంచి ప్రధాన రహదారి వరకు వరుసగా ఉన్న బొమ్మల దుకాణాల్లో ఒక్కసారిగా మంటలు చెలరేగాయి. త్వరలో జరగనున్న సమ్మక్క సారలమ్మ జాతరను దృష్టిలో ఉంచుకుని వ్యాపారులు పెద్ద మొత్తంలో బొమ్మలను సేకరించి దుకాణాల్లో నిల్వ చేశారు. ఒక్కో దుకాణంలో రూ. 8 నుండి రూ. 10 లక్షల విలువైన వస్తువులు ఉన్నట్లు సమాచారం.
మంటలు ఆర్పేలోపే దుకాణాలన్నీ భస్మం
సమాచారం అందుకున్న వెంటనే అగ్నిమాపక సిబ్బంది అక్కడికి చేరుకున్నప్పటికీ, మంటలు విపరీత వేగంతో వ్యాపించడంతో దుకాణాలను రక్షించడం సాధ్యపడలేదు. తమ కళ్ల ముందే సర్వస్వం బూడిదైపోవడంతో వ్యాపారులు కన్నీరుమున్నీరుగా విలపించారు. ఆ ప్రాంతమంతటా తీవ్ర విషాద వాతావరణం నెలకొంది.
షార్ట్ సర్క్యూట్ కారణం – పోలీసులు దర్యాప్తు
మల్యాల, ధర్మపురి సీఐలు రవి, రాంనర్సింహారెడ్డి ఘటనా స్థలాన్ని పరిశీలించి వివరాలు సేకరించారు. విద్యుత్ షార్ట్ సర్క్యూట్ కారణంగానే అగ్నిప్రమాదం జరిగిందని అధికారులు ప్రాథమికంగా నిర్ధారించారు. పోలీసులు కేసు నమోదు చేసి దర్యాప్తు చేపట్టారు.
