అమరావతి, శుక్రవారం 28 : ఆర్థిక మంత్రి నిర్మలా సీతారామన్ తన సింప్లిసిటీ, ప్రజల పట్ల కట్టుబాటు, పనితీరు ద్వారా ప్రతి ఒక్కరికి ఆదర్శమని మంత్రి నారా లోకేష్ పేర్కొన్నారు. శుక్రవారం అమరావతిలో జరిగిన బ్యాంకులు, బీమా కంపెనీల ప్రధాన కార్యాలయాల శంకుస్థాపన కార్యక్రమంలో పాల్గొని లోకేష్ మాట్లాడుతూ, నిర్మలా సీతారామన్ స్త్రీ శక్తికి ప్రతిరూపమని ప్రశంసించారు.
“ఎంత పెద్ద స్థాయికి ఎదిగినా, ఎలా ఒదిగి ఉండాలో ఆమెను చూసి నేర్చుకోవాలి” అని మంత్రి లోకేష్ పేర్కొన్నారు. మంగళగిరి చేనేత వస్త్రాలను ధరించి ప్రోత్సహించినందుకు ఆమెకు ధన్యవాదాలు తెలియజేశారు. అలాగే ఏపీకి కావలసిన సహకారం అందించడంలో సీతారామన్ ఎల్లప్పుడూ ముందుగా నిలుస్తున్నారని వెల్లడించారు.
అమరావతి అభివృద్ధి అడ్డుకోవడం ఎవరి చేతి లైట్ స్విచ్ కాదు: మంత్రి లోకేష్
అమరావతిని ఆపడం ఎవరి ఇంటి లైట్ స్విచ్ ఆపినట్టేమీ కాదని, ఇది ప్రధానమంత్రి నరేంద్రమోదీ శంకుస్థాపన చేసిన పవర్‌ఫుల్ రాజధాని అని మంత్రి నారా లోకేష్ స్పష్టం చేశారు. శుక్రవారం అమరావతిలో బ్యాంకులు, బీమా సంస్థల ప్రధాన కార్యాలయాల శంకుస్థాపన కార్యక్రమంలో పాల్గొని మాట్లాడిన ఆయన, గత ప్రభుత్వంపై తీవ్ర స్థాయిలో మండిపడ్డారు.
లోకేష్ వ్యాఖ్యానిస్తూ, దేవతల రాజధాని అయిన అమరావతిని దెయ్యాలు విధ్వంసం చేయాలనుకున్నాయి అని తీవ్ర విమర్శలు చేశారు. మూడు రాజధానుల పేరుతో మూడు ముక్కలాట ఆడి ఈ ప్రాంత భవిష్యత్తును నాశనం చేయాలని ప్రయత్నించారని ఆరోపించారు. ఒక వ్యక్తి కోసం రూ.450 కోట్ల ఖర్చుతో ప్యాలెస్ నిర్మించారని, అయితే ఆ సమయంలో కూడా అమరావతి రైతులు ‘ఒకే రాష్ట్రం – ఒకే రాజధాని’ అనే నినాదంతో నిస్సహాయంగా పోరాడారని గుర్తుచేశారు. ఎన్ని ఇబ్బందులు వచ్చినా ‘జై అమరావతి’ అని ముందుకు సాగామని మంత్రి తెలిపారు. కూటమి ప్రభుత్వం ఏర్పడిన తర్వాత అమరావతిలోని నిర్మాణ పనులు మళ్లీ జెట్ స్పీడ్‌లో ప్రారంభమయ్యాయని తెలిపారు.
మొత్తం 15 బ్యాంకులు, బీమా సంస్థలు రూ.1334 కోట్ల పెట్టుబడితో తమ ప్రధాన కార్యాలయాలు అమరావతిలో ఏర్పాటు చేస్తున్నాయని మంత్రి ప్రకటించారు. అన్ని బ్యాంకింగ్ సేవలు ఒకే చోట అందేలా బ్యాంక్ స్ట్రీట్‌ను ఏర్పాటు చేస్తున్నట్లు వెల్లడించారు. రాజధానిలోని ఫైనాన్షియల్ డిస్ట్రిక్ట్‌లో ఉన్న ఈ కార్యాలయాల నుండి రాష్ట్రవ్యాప్తంగా జరిగే అన్ని లావాదేవీలు నిర్వహించనున్నట్టు చెప్పారు. అమరావతి రైతుల ప్రతి సమస్యను పరిష్కరించేందుకు త్రిసభ్య కమిటీ కృషి చేస్తున్నట్లు తెలిపారు. గత ఐదేళ్ల విధ్వంసం దృష్టిలో పెట్టుకుని, రైతులు ఐకమత్యంతో అమరావతి అభివృద్ధిలో పాల్గొనాలని లోకేష్ పిలుపునిచ్చారు.
