హిందూపురం: “హిందూపురం రావడం అంటే పుట్టింటికి వచ్చినట్టే” అని ఐటీ, విద్యాశాఖా మంత్రి నారా లోకేశ్ సతీమణి, హెరిటేజ్ సంస్థల ఎగ్జిక్యూటివ్ డైరెక్టర్ నారా బ్రాహ్మణి అన్నారు. శుక్రవారం ఆమె హిందూపురం నియోజకవర్గంలోని చిలమత్తూరు, లేపాక్షి, హిందూపురం మండలాల్లో పర్యటిస్తూ విద్యాసంస్థల అభివృద్ధిపై పలు కార్యక్రమాలు చేపట్టారు. చిలమత్తూరు జూనియర్ కళాశాల, లేపాక్షి మండలం కుర్లపల్లి, హిందూపురం మండలం పూలకుంట ప్రభుత్వ పాఠశాలలకు కంప్యూటర్లు, ప్రింటర్లు అందజేసిన బ్రాహ్మణి, విద్యార్థులకు నాణ్యమైన విద్యను చేరువ చేయడం తమ బాధ్యతగా భావిస్తున్నామని పేర్కొన్నారు.
లేపాక్షి నవోదయ పాఠశాలలో ఏర్పాటు చేసిన సోలార్ గీజర్లను కూడా ఆమె పరిశీలించారు. ఇవన్నీ హెరిటేజ్ సంస్థ ఆధ్వర్యంలో అందించిన వసతులేనని తెలిపారు.హిందూపురం అంటే నందమూరిపురం అని, ఇక్కడి నుంచి తమ తాత నందమూరి తారకరామారావు, పెదనాన్న హరికృష్ణ, తండ్రి నందమూరి బాలకృష్ణ ప్రజలకు సేవ చేశారని బ్రాహ్మణి గుర్తుచేశారు. ఈ నియోజకవర్గంతో నందమూరి కుటుంబానికి బలమైన బంధం కొనసాగుతుందని అన్నారు. భవిష్యత్తులో కూడా హెరిటేజ్ సంస్థ విద్యారంగానికి మరింత సహకారం అందిస్తుందని హామీ ఇచ్చారు.
విద్యార్థులు విలువలతో కూడిన విద్యను నేర్చుకుని సమాజానికి ఉపయోగపడే వ్యక్తులుగా ఎదగాలని బ్రాహ్మణి సూచించారు. ఆమె పర్యటన సందర్భంగా విద్యార్థులు, ఉపాధ్యాయులు ఘన స్వాగతం పలికి పుష్పగుచ్ఛాలు అందజేశారు. పూలు చల్లి ఆహ్వానించిన విద్యార్థులతో ఆమె ఆత్మీయంగా మాట్లాడారు. పాఠశాల గదులు, లైబ్రరీలు, ల్యాబ్‌లు ఆమె పరిశీలించారు. ఈ కార్యక్రమంలో టీడీపీ కోఆర్డినేటర్ శ్రీనివాసరావు, పూలకుంట సర్పంచ్ మంజునాథ్, ఎమ్మెల్యే పీఏ బాలాజీ, నాయకులు రామకృష్ణారెడ్డి, గంగాధర్, శ్రీనివాసులు, చంద్రప్ప తదితరులు పాల్గొన్నారు.
